6月起入職公僕 退休齡延長

【明報專訊】政府噚日公布，今年6月起新入職嘅公務員，退休年齡將會延長，如果係文職公務員，退休年齡會由家60歲提高至65歲；紀律部隊就由家嘅55或者57歲，提高至不論職級都係60歲。政府發言人話，對於現職公務員，當局會制訂彈性措施延長佢哋嘅工作年期，以應付個別部門運作同繼任需要，維持有效管理，平衡不同公務員群組利益。


政府發言人補充，當局正就其他受僱機制制訂執行細節，會同管方、職方保持緊密溝通。


紀律部隊早前要求，應該要將現職人士都延長退休年齡至60歲，對於今次決定，紀律部隊人員總工會主席麥錦輝話，佢哋都歡迎政府今次安排，特別係早前政府提出紀律部隊去到57歲後，就要做體檢等先可決定係咪可以延長，今次改變呢個安排算係進步，又透露噚日同公務員事務局長鄧國威見面，對方透露正制訂指引，處理現職紀律部隊延長退休年齡安排，相信4月會有方案喎。