明報奪4國際獎

【明報專訊】《明報》繼喺香港報業公會最佳新聞獎大豐收後，噚日再喺第36屆國際新聞設計協會（The Society for News Design, SND）「最佳報章設計」大賽中勇奪4個卓越獎（Award of Excellence），作品更會收錄喺專刊中，真係可喜可賀，Emily喺度恭喜得獎手足。


全涉佔中元素

4個卓越獎中，有兩個係版面設計獎項，獲得突發新聞版面設計獎嘅係舊年9月29日見報嘅版面，記錄9•28當天警方喺金鐘施放催淚彈，以及佔領擴散至旺角及銅鑼灣，美術同事將3區衝突現場嘅照片並排喺頭版，見證歷史一刻。另一個版面設計獎就來自Sunday Workshop舊年10月19日嘅專題報道，同樣喺佔領期間，但記錄嘅係新聞工作者嘅一面。


另外兩個卓越獎則屬於照片獎項。舊年3月2日《明報》前總編輯劉進圖遇襲後，逾萬名新聞工作者同市民擠進政總前廣場參與反暴力大遊行，高舉「They can't kill us all」橫額，攝記李澤彤從高處拍下這個震撼場面。


另一張照片就拍攝佔領時期旺角衝突一幕，攝記余俊亮鏡頭下劍拔弩張嘅畫面，讓讀者猶如置身現場。