大家樂饑饉三十 食住做善事

【明報專訊】專門賣飯嘅大家樂（0341），舊年搞完「饑饉三十」活動後，今年繼續添食，畀大家繼續餓住個肚做善事。今年玩法其實同上年一樣，都係買個「芝味厚切一哥焗豬扒飯」，可以一邊食一邊做善事。


活動由今日開始至到4月17號，呢個活動每人就一定要捐36蚊，不過可以揀「全饑饉」或者「半饑饉」，揀前者就齋捐錢唔食飯，揀後者就畀全價但食半個飯，中間有18蚊由大家樂捐去宣明會，而每位客人都會獲贈一杯飲品。大家每參加一次，大家樂自己都會同時捐10蚊。


查返舊年活動，大致都差唔多，不過個飯就價值34蚊，同埋大家係捐17蚊，即係都可以話通脹令大家捐多咗錢。


宣明會總幹事趙煥明就話，家全球有8億人肚仔捱住餓，即係每9個人就有1個人，不過大家唔使灰心，因為單單過去一年，就已經有3000萬人脫離饑餓行列。各位食得少嘅朋友，不妨都考慮下買半個飯做善事吖！


email: piano@mingpao.com

[小琴密語]