陳家洛為愛女唔去黨慶

【明報專訊】近日特首次女梁齊昕成為社會焦點話題，所謂天下父母心，有立法會議員就分享與子女相處之道，或者都值得大家參考一下。


有4女1子嘅公民黨陳家洛話好重視家庭，為咗3個女嘅音樂戲劇表演，連日前公民黨9周年黨慶都唔去。家洛話同仔女嘅關係要由細培養，除咗帶佢哋去唔同地方遊玩，仲可以帶佢哋去父母工作嘅地方見識，例如公民黨有步行籌款活動，佢都會帶仔女見識吓。如果發現囡囡有心事，除咗安慰，仲要主動了解原因，睇吓會唔會係失戀，或者同朋友嗌交導致。陳家洛強調，雙方相處時一定要坦白。


工黨李卓人個女已大學畢業，阿人話同囡囡相處之道就係從小投其所好，阿人由比卡超到哈利波特都認識，佢話家個女對藝術文化有興趣，自己都會去Art Basel參觀再分享。佢話個女唔開心會出聲，對父母都好信任。


梁齊昕不時都喺社交媒體分享感受，但阿人就話，可能自己個女明白老竇係公眾人物，所以喺社交媒體好少分享個人事。