夏蕙BB撐性文化節

【明報專訊】一年一度嘅香港性文化節又到喇，今年玩食字以「性裳色」為主題，希望透過服飾引起社會對性嘅討論。主辦機構做咗個調查，發現無論男女都覺得緊身、透視同低胸衫最能引起性興趣，但講到乜嘢衫最性感，男女就有唔同睇法。特別嘉賓黃夏蕙（夏蕙BB）仲親身示範如何年過八旬仍話性感就性感。


調查：男人穿西裝最性感

第七屆性文化節由家庭計劃指導會（家計會）同香港性教育會合辦，性教育會委員曹文傑話，舊年11月至今年2月，佢哋喺網上調查訪問咗647人，無論男女都覺得男士著西裝最性感；不過講到女性，男士普遍覺得女士著泳衣最性感，但女士就覺得著旗袍最性感（見表）。至於最想邊樣衣物喺地球上消失，大部分人都有揀T-back內褲同腰封。


夏蕙BB同Emily講，雖然佢已經過83歲，但絕對唔會忌諱性感衫，「無理由（老咗）要換件衫話畀人聽我老咗！」性文化節創辦人吳敏倫補充，長者一樣有性需要，但好多時就因為社會風氣而受到抑壓。


性文化節會喺3月27號（周五）至30號（周一）喺石硤尾賽馬會創意藝術中心舉行，有舞台劇同論壇等，費用全免。