謝偉俊倡當兵換宿

【明報專訊】唔少後生仔成日呻香港買樓「上車」難，立法會議員謝偉俊（Paul）諗到一條橋，話既可以解決住屋問題，又可以令年輕人愛國，阿Paul建議將本地軍營轉型，興建單人宿舍，年輕人如果喺內地當夠3年兵，就可以免費住軍營嘅單人宿舍10年。阿Paul話議員辦事處內嘅後生職員個個都話正㗎。


稱辦事處職員個個話正

阿Paul噚日喺DBC《早晨八達通》節目上分享呢個構思，話知道有年輕人有興趣了解國家，提議政府設立一個自願當兵機制，等香港嘅後生仔都可以嘗試當兵，當夠3年兵仲可以免費喺軍營內住10年。阿Paul話呢個提議除咗可以畀年輕人鍛煉體能、提升紀律，仲可以學習合作同互相尊重，比起目前嘅「光復行動」有意義。


令港人領略中央關心

Emily後來喺立法會撞到阿Paul，阿Paul話呢個只係初步構思，未同北京講過。佢覺得要解決房屋問題，可以同中央傾，將軍事用地轉作興建單人宿舍。佢話軍營地點喺市區，方便後生仔返工。


阿Paul仲話參與計劃嘅後生仔唔止可以儲錢買樓，亦會令人知道中央關心香港人，咁就可以令人更愛國。至於點解會諗到呢個建議，阿Paul就話「呢啲叫創意」，希望可以將唔同社會問題嘅解決方法，炒埋一碟解決。