反佔領交通團體 料成功能組選民

【明報專訊】人大常委會決定明年立法會選舉唔准大改，沿用番2012年嘅35席直選、35席功能組別，政府最近就提出就立法會選舉嘅法例修訂，為部分功能組別增減選民。Emily留意到，去年只得200個選民嘅航運交通界，將新增兩個公司票選民，其中一個係「香港計程車會」，呢個會近期嘅代表作，就係主席黎海平喺舊年佔領期間，有份向法庭申請旺角禁制令。


政府文件喺備註話，香港計程車會喺2003年按《社團條例》註冊，係運輸署市區的士事務會議嘅活躍成員，亦有參與其他同的士營運有關嘅諮詢組織，好似優質的士服務督導委員會。


另一新增公司票選民係「交通基建管理合約有限公司」，呢間公司之所以做到選民，係因為佢家負責營運青馬管制區，至於原本嘅營運者「交通基建管理有限公司」，由於家接管咗香港仔隧道管理，所以繼續係選民。兩間公司個名咁似嘅？梗係啦，因為「交通基建管理合約有限公司」嘅股東，就係「交通基建管理有限公司」嘛。