李東生：稱霸全球「言之尚早」

【明報專訊】小米董事長雷軍近年係兩會紅人，噚日佢拎住枝自拍神器現身會場，又惹來記者追訪，即使豪言話要10年內做全球智能手機一哥。


不過佢嘅競爭對手TCL集團董事長李東生（圖）就話要稱霸全球「言之尚早」，似乎暗寸雷總發夢無咁早喎。


李東生話，雖然小米同TCL舊年都排全球手機銷量頭五位，但係比起蘋果、三星呢啲真正龍頭，仲有一大段距離，就算TCL舊年喺部分市場跑贏三星，不過「這一刻就想做世界第一，似乎言之尚早」。


除咗稱霸全球之外，市場對小米另一個大疑問係幾時上市。雷軍話，冇改變過未來5年唔上市嘅決定，因為公司仲有唔少問題同困難要解決。佢又透露話要殺出中國，進軍美國發布小米網mi.com，兼且推出小米移動電源喎。