林鄭又被捕獲 唐唐也自拍

【明報專訊】推動政改嘅政務司長林鄭月娥，噚日朝早又落區，今次佢去太古城宣傳，向居民派發政改宣傳單張，一個鐘派咗800張，順便再派埋筆"口添"。話說嗰個位有唔少學生經過，現場人士留意到，唔止中小學生，連幼稚園生也有人認得林鄭，仲主動走去握手，可能政改宣傳片成日喺電視機播放，進一步推高林鄭嘅知名度啦。
政改咁鬼嚴肅，但有市民一見到林鄭月娥就去「野生捕獲」，呢名女士唔使用自拍神棍，就已經好熟手攞住部手機就同司長合照喇。
除咗市民同林鄭玩自拍，喺北京嘅全國政協常委唐英年都玩埋一份。出席兩會嘅唐唐，噚日喺微博上載咗兩張自拍照，佢話今年北京天氣唔錯，佢第一次喺兩會見到落雪，而趁開會前，佢出咗去玩同「selfie」（自拍）。講開互聯網，唐唐話佢今年其中一個提案課題就觸及互聯網，佢話互聯網嘅威力係發揮經濟同創意嘅最大潛力，特別係年輕一代。