Ann姐訪阿妹 蔣麗萍為佔中反思

【明報專訊】民建聯蔣麗芸（Ann姐）日前喺《蔣麗芸會客室》節目訪問細妹蔣麗萍（Agnes）。一提起Agnes，唔少港人都記得佢係1980年代當紅歌手，但佢選擇喺事業高峰下急流勇退。信奉基督教嘅Agnes兩年前開始經常到內地，幫助教會向兒童傳福音，仲話為咗幫吓時下青少年而要復出。


Agnes話，舊年令佢最深刻係9月底發生佔中後，無論佔中抑或反佔中，都畀佢睇到好多青少年內心有一股怒氣同憤憤不平，令佢有好大反思，「特別因為我跑得農村多，佢哋乜嘢都無，少少嘢就好易滿足、開心感恩；相對上香港好富裕，但睇到呢一代唔係物質可以畀到，而係一種心靈上嘅需要」。佢認為，香港嘅教育喺培養價值觀同心靈成長上，對下一代都無乜點落墨，認為長輩都有責任。


Agnes又話，為咗佔中反映出嚟嘅問題，佢同一班好朋友例如藝人毛舜筠等，成立咗名為「一生最美的祝福」嘅音樂佈道團，未來會一齊落18區分享生命見證，希望將生命嘅盼望帶畀唔同區嘅市民，令更多人得到心靈滿足。