鄉議局團拜 袁國強未用過自拍神棍

【明報專訊】財政司長曾俊華早前開咗facebook同網民交朋友，又多次同記者用「自拍神棍」影合照，追上潮流，亦成為近日熱話，據聞唔少官員都打算跟隊開番個fb，加強用社交媒體宣傳。不過律政司長袁國強噚日出席鄉議局新春酒會，佢同記者傾偈時就講，佢自己其實從來都無用過「自拍神棍」，又話自己好落後，所以都唔打算開fb。


有記者問袁國強家要宣傳政改，似乎玩fb都有助宣傳喎，袁國強就笑住話，政制及內地事務局長譚志源上鏡過佢，呢啲由對方做比較好。雖然袁國強唔玩自拍，但年輕議員就追上潮流喇，噚日出席同一酒會嘅民建聯陳克勤，就喺活動上同黨友何俊賢、李國英3個「麻甩佬」用手機自拍，克勤似乎唔太習慣，唔太識望鏡頭。


發叔有face CY葉太齊出席

講番噚日鄉議局酒會，好多官員都畀面出席，中聯辦主任張曉明仲罕有著中山裝現身，而喺馬爾代夫曬到黑晒嘅特首梁振英，上任特首以來第一次出席鄉議局酒會，皆因以前嘅酒會都撞正佢放緊假，當記者讚鄉議局主席劉皇發好有面子，發叔亦摸吓塊面以示有face。


早排畀「麒麟」撞低嘅新民黨主席葉劉淑儀噚日亦現身酒會，貴為行政、立法兩會議員，葉太當然有獲邀請，仲企前最排