【明報專訊】踏入年初八，小弟恭祝各位讀者新春大吉、喜氣羊羊，投資唔會做羊牯，老婆女友純如綿羊，身邊有隻麒麟神獸守護辟邪。昨日人日，人人生日，香港的財金界有兩件大事：一朝早就有長和系開股東大會，最後獲得逾99％股東支持重組合併，李超人神采飛揚；然後就係財爺曾俊華公布財政預算案，退稅最高上限兩萬蚊，較預期為多，中產終獲小甜頭。雖然財爺年年估錯數，但估計呢份預算案的支持度，一定會比施政報告更高。
呢個農曆新年，如果手持長和系股票，都可以飲得杯落，李超人昨日畀股東問及有乜遺憾，他說自己工作時間有限，終有一日要退下來，託賴身體仲健健康康。然後當他講到自己能令長和系合併，走向大成功路，即博得全場股東鼓掌，最終逾99％股東支持通過重組合併，呢個結果，令「遷冊」陰謀論不攻自破。
資本主義社會 讓股東說話
自長和系公布重組合併以來，內地官方媒體反應不大，唯獨《環球時報》以評論文章質疑超人遷冊，甚至明示暗示「李嘉誠效應」對內地經濟保持穩定增長的負面影響經已浮現，跟住最好笑係，香港有親梁報章指李超人已不是中央最愛的商家。
大佬呀，首富想在有生之年完成架構重組，等個仔接班順利啲啫，使唔使講到係咪「受國家寵幸」咁肉麻呀。家人哋股價升，逾99%股東支持，呢個信息好緊要，香港仲係實行資本主義，仲係自由市場，商業決策，就應該讓股東說話，唔好忘記，滬港通落實，內地股民都受惠㗎﹗
誰是阿爺都未知 恐怕表錯情
今時今日，小弟覺得最怪的現象就係過分解讀所謂領導人的信息，現在上面班大佬鬥到飛起，都唔知邊個先至係阿爺，《環球時報》係邊個大佬管，個大佬穩唔穩，都係未知數，一篇評論文章，更加不能可以代表習大大領導的官方睇法，但就畀有心人用來扣帽子，這種手法，近年在香港屢見不鮮。「阿爺放個屁」都會地震，呢種奴才思維，在近兩年的政圈分外氾濫。
金融科技夠實際 財爺勝梁特
至於《財政預算案》，派糖措施一如既往，小弟反而最欣賞係香港可以引入外國的美食流動車，一睇到呢個建議，食指大動，如果管理得宜，有合理的發牌制度，仲可以推動本土經濟，就算賣魚蛋，都應該加入創意，做到《食神》嗱渣麵瀨尿牛丸咁嘅效果就正喇﹗另外，值得一提係財爺首次提及研究推動香港成為「金融科技中心」，而金融科技涵蓋支付同結算交收系統、大數據分析、雲端計算等，仲要求財經事務及庫務局成立督導小組委員會，對於一心要成立創新科技局的梁特來說，簡直係摑咗佢一大巴！
鬍鬚曾呢一招高呀，相對個高大空的創科局，做金融科技務實好多，亦證明咗創科局根本無迫切性，只要現行的政策局加入科技小組，教育可以有科技，環保可以有科技，民政都可以有科技，咁就既可慳錢，也可以真正將科技融入政策。
劉鳴煒捐錢爭議 隨時無疾而終
文末，不得不讚自己，小弟上兩篇文提到為人節儉的劉鳴煒無故捐四億畀瑞典某著名醫學中心，然後就給傳媒踢爆同梁特個仔有關連。
「港人講地」還提出怪論，話梁特個仔好叻，根本不用靠老竇關係，但問題唔係你叻唔叻，而係梁特有無運用他的特殊身分，讓商界受壓而作出一些決定。事情如何發展，會否好似張震遠事件、梁特收取澳企四千萬巨款事件咁無疾而終，拭目以待。
[應正亮 廿四味]
新聞類別
財經
詳情#
回應 (0)
