CY讚阿仔叻：唔使我鋪路

【明報專訊】《壹週刊》早前報道，華人置業主席劉鳴煒捐款5000萬美元（約3.9億港元）予瑞典卡羅琳醫學院（Karolinska Institutet），仲引述劉鳴煒話捐款係由特首梁振英（CY）促成；但CY無申報佢嘅長子梁傳昕正喺卡羅琳醫學院做研究，惹嚟CY為兒子「鋪路」嘅質疑。CY噚日見記者時，重申梁傳昕獲學院取錄同劉鳴煒捐款「完全無關」，又話阿仔學業同研究工作都做得相當唔錯，「根本唔需要我鋪路」。


CY話，梁傳昕25歲喺英國劍橋大學完成博士學位，跟住香港裘槎基金畀咗一個獎金繼續做研究，傳昕係畀世界頂尖嘅醫學研究機構取錄，根本唔需要佢鋪路。佢仲形容自己喺傳昕成個學習同研究過程中，幫唔上咩忙。


報道指劉鳴煒「超級瑞典通」

噚日出版嘅《東周刊》就引述「熟識劉鳴煒嘅人」話，「劉鳴煒為人好低調，不喜歡透露咁多私隱，但其實佢似超級瑞典通」，又話劉喺瑞典有物業同投資，向卡羅琳醫學院捐出巨款，一啲都唔奇。