Ann姐論特首：應有直選經驗

【明報專訊】向來好客嘅民建聯副主席蔣麗芸（Ann姐）噚日邀請一眾行家去到佢漾日居嘅屋企拜年。除咗談論政事，Ann姐仲即席獻技唱番幾首歌娛賓，包括梅艷芳嘅《心債》。佢笑言自己音域可以好闊，低音唱到梅艷芳，高音可以唱到葉蒨文咁高。


獻唱《心債》 自稱音域廣

政圈唔少人都關注下屆特首嘅事，Ann姐話覺得下個特首應該要有直選經驗，咁先可以更了解民情，如果無直選經驗，最好都應該有政府經驗喇。


咁講法，唔通佢撐新民黨主席葉劉淑儀做特首？但佢話對方係黑馬，講講吓又話民建聯可能都有人可以選，一眾記者問唔通Ann姐所指嘅係政制及內地事務局副局長劉江華？但佢又話自己無講過喎。


至於立法會選情，近日盛傳九西可能下屆會加多一席到6席，Ann姐就話最好梗係民建聯拎兩席，噚日佢仲特登帶埋油尖旺區議員葉傲冬同深水埗區議員鄭泳舜出嚟見傳媒，但就唔肯講自己支持邊個出選。唔少人都記得Ann姐同屋企人住大埔，佢話作為九西議員，喺九龍站住都好方便，家都有一半時間住喺漾日居。咁Ann姐係九西定係新界東嘅選民呢？佢自己唔多清楚，話要返去問問秘書。