霆鋒伙猛人搞「鋒味曲奇」

【明報專訊】型男謝霆鋒（圖）近年由娛樂圈殺入商界，未夠40歲已經成為上市公司大股東，但佢依然對飲食生意情有獨鍾，小琴八到，佢近排仲拍埋已故全國政協副主席安子介外孫楊鼎立（Derek）夫婦開創新品牌「鋒味曲奇」，兩位老闆來頭咁猛，睇嚟大搞嘅機會好大。


小琴發現，霆鋒早排同Derek已經成立咗一家叫「籤語餅」嘅公司，Derek老婆、曾經喺匯豐做Banker嘅翁嘉敏（Liana）都係董事。


小琴問過霆鋒經理人兼好朋友霍汶希（Mani），佢話霆鋒今次拍住Derek兩公婆會合作搞「鋒味曲奇」，食埋《12道鋒味》個字，莫非想同近年大熱嘅Jenny's Cookie對撼？

霆鋒近年好似對飲食業特別有興趣，已經投資咗幾間食店，而今次拍住霆鋒一齊搵食嘅Derek亦出名瓣數多，本身頗具背景嘅佢，除咗係亞洲煤業（0835）執董外，仲係女士美容網站she.com老闆，亦有搞好多唔同類型嘅生意。不過，據講今次Derek老婆Liana參與較多，皆因佢家已經搞緊一間私房餅店Beyond Dessert，專門做Party到會嘅糕餅，收費仲一啲都唔平，一套供30名客人用嘅不同糕餅，收費至少9800蚊，如果要加多個兩磅蛋糕，仲要成15,000蚊