何俊仁 將上網台煮餸

【明報專訊】新正頭要有新目標，20年無入過廚房嘅民主黨何俊仁，新年首個目標應該喺練烚蛋，事關佢即將會亮相網台節目，同大家一齊煮嘢食，而個網台仲係同人民力量關係密切嘅「謎米」。


Emily噚日同傳媒行家去仁哥屋企拜年，聽到佢會去網台謎米做節目講國情，一度以為聽錯，不過仁哥就叫大家唔好大驚小怪，仲話謎米創辦人蕭若元其實都好「大中華」。


仁哥開咪講國情前，先要上黨友游月華喺謎米嘅節目煮番兩味，Emily聽到呢個消息再次以為聽錯，連企喺旁邊嘅何太都聽到搖頭嘆息，話仁哥連燈膽都唔識換！不過仁哥嘅意志未有因而消減，仲話會努力，由淺入深，先練習烚蛋。