甩鞋空姐赤腳舞 網民萬like

【明報專訊】前晚大年初一嘅花車匯演，國泰航空以「翱翔人生」做花車主題，派出80個空姐空少，著住制服沿途熱舞，令市民印象深刻，拍手叫好。前晚網上流傳一張當晚空姐空少表演嘅相，其中一位空姐冇著鞋，只著住絲襪「赤腳」跳舞，到底係咩一回事呢？


甩一隻 除埋另一隻

Emily聯絡上載相片嘅空少，佢話唔知相中女同事嘅身分，當日佢喺表演完後才收到相，睇住張相心情好複雜，一來佢擔心同事有無受傷，因為巡遊路線好長，沿途走動跳舞，赤腳確實非常困難，完成後佢無聽到任何表演同事提及此事。其次當然係充滿感動同敬意，同事為咗大局，默默忍受皮肉之苦，非常了不起。


據佢張相寫嘅簡介，呢位空姐表演時懷疑甩咗一隻高踭鞋，索性除埋另一隻，由文化中心一路赤腳跳足全程。國泰方面就話唔評論facebook上嘅私人相片，但就對於前晚表演同事嘅付出予以肯定。唔少網民睇到，都紛紛留言話呢位空姐好專業，精神可嘉，短短半日就有12,000個讚好，真係好過賣廣告，Emily都要畀個讚你！