單仲偕「搭馬航」吉隆坡過年

【明報專訊】農曆新年前立法會仲有好多會要開，但唔少議員已經計劃趁新春假唞一唞外遊，民主黨單仲偕（圖）大年初一就同太太搭馬航去吉隆坡旅遊，同行嘅朋友就唔理佢，堅持搭國泰機。單仲偕好坦白同Emily講，買馬航係因為貪平，兩個人來回機票只係5516元，而機票係早於馬航空難前買，估唔到馬航客機之後接連出事。


唔諗咁多已買保險

單仲偕諗住同老婆及朋友初一至初五去吉隆坡歎吓酒店、打一兩日高球，佢上年3月已買定機票，所以價錢好平，惟買咗之後，先有馬航客機失蹤，後有客機喺烏克蘭上空被擊落。單仲偕話唔諗得咁多，買咗機票就去，而佢兩公婆一早已買咗全年適用嘅旅遊保險。不過，佢話朋友就鍾意搭國泰，所以各自出發喺當地會合。


梁家傑計劃英國探女兒

公民黨黨魁梁家傑計劃新年去英國探囡囡Jennifer，但仲未買到機票，不過佢大年初七（2月25日）又要趕返香港聽財爺發表嘅財政預算案，所以即使成行都只去得一個星期。


Jennifer暫時放低牛津大學嘅學業，家同倫敦莎士比亞環球劇場（Shakespeare's Globe Theatre）巡迴各地演出《哈姆雷特》，2月中會返英國休息兩周，廿四孝老竇嘅傑哥把握時間見吓個女。原來傑哥之前就同劇團監製建議，叫劇團來港演出，就連西九管理局行政總裁連納智都話提議好﹕「We must get them here﹗」傑哥話聽聞劇團9月有機會來港演出，不過即使成事，剛剛提出呈辭嘅連納智都應該返咗澳洲老家咯。