駐港總領事撐港台《遊學全世界》

【明報專訊】唔知喺咪畀人話外國勢力介入香港事務，近排外國駐港領事好似鮮有露面，不過噚日幾十個外國駐港總領事就雲集香港電台，唔通港台「勾結外國勢力」？原來係港台數碼台節目《遊學全世界》邀請咗超過30個外國駐港總領事出席節目新環節「領事系列」啟播禮。


各領事未來會喺新環節介紹去佢哋國家「必到、必學、必做、必體驗」嘅事，噚日率先分享咗佢哋國家嘅重要節目，趁機推廣當地旅遊。當中愛爾蘭總領事就預告，今年會首次喺香港搞St Patrick's Day巡遊，呼籲大家喺4月17日著綠衫應節參加。


各領事都只風花雪月，不談政經時事。好似喺佔領期間當住政務司長林鄭月娥稱讚香港年輕人值得港人驕傲嘅德國總領事蘭布斯多夫，噚日對香港政改不欲多談，只係同Emily透露佢農曆新年會喺吉隆坡過。噚日活動亦未見英美總領事。