海洋公園逐步免費Wi-Fi

【明報專訊】公共場所提供免費Wi-Fi服務已成為大趨勢。海洋公園噚日就宣布同香港寬頻合作，未來一年會分兩階段喺園內提供免費Wi-Fi，首階段會喺今年第三季完成，覆蓋範圍包括正門入口、海洋奇觀、海洋列車海濱站和高峰站、冰極餐廳同埋部分園內景點；第二階段估計喺出年第一季完成，全面覆蓋整個公園，到時所有景點、餐廳、禮品店、劇場、旅客輪候區，甚至纜車等都可以免費用Wi-Fi；至於喺2017年啟用嘅全新水上樂園，亦會有Wi-Fi覆蓋。


海洋公園行政總裁苗樂文話，海洋公園會設置超過470個Wi-Fi熱點，提供最高每秒1GB嘅傳輸速度，可以同時支援超過4萬部流動裝置，外地遊客到時可慳番啲漫遊費用。


另外，佢話海洋公園嘅流動應用程式（App）將會喺出年增加6個功能，包括畀遊客了解每個景點嘅排隊時間、提供景點及設施預約服務，以及發放即時資訊等，希望畀旅客可以輕鬆暢遊每個景點。