王國興願與宇人度情人節

【明報專訊】立法會財務委員會噚日朝早又開會兩個鐘，審議創新及科技局撥款，大家都討論近日不斷加會情况，對於財委會喺情人節當日，除咗上午要開4小時外，佢哋亦正諮詢緊有意下午開多4小時會。


卿姐斥張宇人偏幫政府

對呢個建議，民主黨主席劉慧卿就大表不滿，話情人節要開會不特止，中午食飯時間只得半個鐘，直指張宇人「無人性」，批評佢偏幫政府。


張宇人就回應話，佢當日都約咗老婆，但講笑話可能太太最終都要睇直播先見到佢。劉慧卿就質疑政府會唔會隨時夜晚都加會，搞到成班議員情人節都喺議會過，張宇人就話多謝卿姐提醒政府咁話。


一直表明願意「日以繼夜、夜以繼日」開會嘅工聯會王國興（圖），噚日更加向張宇人「示愛」，話「願在情人節與你一齊作戰」，提出通宵開會，引起全場嘩然，佢就話「你唔係我情人，但我願意開會」。不過張宇人話自己都無法承受通宵開會嘅壓力。經民聯林健鋒就話情人節活動「主要都喺夜晚黑」，支持下午加開會議。