Ann姐帶民記「小花」落區

【明報專訊】早前有傳媒報道，民建聯派出來自「工運世家」、年輕兼高學歷嘅「小花」陳穎欣（圖左）到深水埗麗閣選區，準備挑戰民協馮檢基嘅區議員議席。噚日，民建聯副主席蔣麗芸（Ann姐，圖右），就帶住呢個小花Joephy請願，要求領匯於麗閣商場增建自動門。佢哋話，唔少麗閣邨嘅老人家要坐輪椅出入，要佢哋自己坐喺輪椅上面開門，會有難度。


當然，一般人未必會理解呢班老人家苦况，Joephy就拍咗段短片，自己坐埋喺輪椅上面試吓出入商場，展示畀人睇，老人家輪椅車到埋去，個轆會頂到道玻璃門。Joephy仲將短片擺上網，起碼唔會好似掛banner咁，畀人剪到啲人頭爛晒，認真識宣傳。


領匯早前話，已經喺2014年中喺商場加建多項「暢通無阻通道設施」，Joephy就質疑，如果用輪椅同拐杖嘅人無辦法入到商場，咁點享用到呢啲設施？領匯經理噚日話聽到意見，會小心考慮。


其實，要勞煩Ann姐帶小花出嚟爭取曝光，為小花鋪路好似好明顯喎，但Ann姐話Joephy出唔出選仲要等黨決定，叫Emily畀啲耐性喎！