朝9晚8 昂坪360新年加班

【明報專訊】羊年就到，每年農曆年都係纜車昂坪360嘅人流高峰期，所以昂坪360宣布今年農曆年將會延長服務時間，網上訂票服務亦會由出發前7日增加至14日，想去嘅市民就可以提早買飛喇。


昂坪360平日由朝早10點開到晚上6點，但喺初一至初四會由9點開到晚上8點，亦會喺東涌港鐵站同纜車站入口增設流動售票櫃位。


至於纜車延伸至大澳嘅計劃，昂坪360董事總經理關敏怡話只係同政府好初步接觸過，一切言之尚早，但對計劃持開放態度，仲話就算未來客量倍增都無有怕，因為昂坪360其實計埋企位最多每日可以接待1萬9500人㗎。


關敏怡噚日同一眾傳媒飯敘兼開簡布會，佢話舊年一共有183萬人搭昂坪360，較前年增加10.9%，平均每日有5300人到訪。賓客嘅分佈亦相當平均，有51%來自亞洲同歐美國家，31%來自內地同澳門，18%來自本地。


關敏怡同Emily講，舊年嘅佔領行動唔多唔少都令到訪360嘅人數增長放緩，主要係華南同東南亞嘅旅客減少，所以公司喺嗰幾個月都增加咗本土推廣，到12月客量先恢復平穩。