無知定騙子？ 陳啟宗批評爭真普選

【明報專訊】恒隆集團主席陳啟宗過去評論政府施政等問題，都有唔少「金句」，噚日香港發展論壇邀請咗中大政治與行政學講座教授王紹光、內地觀察者網創辦人李世默，講中國與香港民主發展，陳啟宗批評爭取真普選嘅人，「不是無知就是騙子」。


陳啟宗噚日同大家講吓民主係咩，佢話西方民主經歷咗二三千年發展至今，已出現好多難處，「目前已經走到了死胡同，掉到了火坑裏」，仲大鬧港人身在福中不知福，話香港嘅選舉制度係最好，甚至西方都要借鏡，因為有功能組別，可以制衡西方民主選舉嘅弊端喎。


對港人追求「真普選」，王紹光反問「哪裏有？」，佢話所有民主都係假，目前所有西方國家、中國都好，都係行混合政體，認為世界上無完美政體。


李世默就話，民主作為理想價值觀係好嘢，其實過去1000多年，民主卻係骯髒、唔受歡迎嘅字，只係近代經歷啟蒙運動後，民主先成為人類追求嘅嘢，但佢認為民主也正面臨巨大危機，「經歷愈狂熱、愈華麗，走向衰敗就愈快的歷程，就像是迴光反照」。