華仔影響力勝CY

【明報專訊】雖然話中國近年「大國崛起」，喺國際舞台上嘅影響力愈來愈大，不過，有團體調查話，受訪者「心目中最具影響力的領袖人選」唔係國家主席習近平，而係美國總統奧巴馬。晉峰青年商會噚日發表一份關於「明日領袖」嘅問卷調查，發現17%受訪者話奧巴馬係「心目中最具影響力的領袖人選」，習近平有8%支持，屈居第二。


奧巴馬第一 習近平第二

呢份問卷調查喺去年12月23日至今年1月15日期間做嘅，話訪問咗294個市民，藝人劉德華都有3%支持率，比特首梁振英（CY）嘅2%仲高。不過，CY唔使灰心，雖然得2%支持率，但佢喺支持度方面，就同韓鮮領導人金正恩、毛澤東，以及耶穌等齊名。


行政會議召集人林煥光噚日獲邀出席問卷調查嘅發布會，佢喺會上分享咗領袖應有條件，包括有長遠嘅目光、有融和能力解決矛盾、可令人信服，以及個人有道德規範等。被問到CY有無缺少上述任何方面嘅特質，林煥光就笑笑口話唔會評論個別人士。