梁美芬毛孟靜為戴耀廷鬥嘴

【明報專訊】立法會保安事務委員會噚日舉行特別會議，席上議員為去年底嘅佔領運動向警務處長曾偉雄質詢，又質疑政府利用警隊處理政治事件。經民聯議員梁美芬話，佔中三子之一戴耀廷早喺2013年初聲稱要「癱瘓警隊」，所以唔存在「利用邊個」，但就被公民黨毛孟靜指佢無中生有。梁美芬聞言反駁，話講法係引自2013年1月及2月《壹週刊》，叫毛孟靜返去「做吓功課先」。


「癱瘓警隊」言論各有理解

毛孟靜喺議會話，佔中三子有兩個大學教授（戴耀廷、陳健民），佢哋「真係教書唔係hea」，無可能話癱瘓警隊，等罪犯可以打家劫舍咁話。


不過，梁美芬駁斥，自己睇到戴耀廷喺2013年1、2月接受《壹週刊》訪問，都覺得好震驚，引述戴耀廷話「成個警隊有2.8萬人，如果我哋有1萬人，每個要2.5個警員抬走，就可以癱瘓警隊」，叫毛孟靜做吓功課，仲話「唔怪得人哋話你毛查查啦」。


Emily翻看《壹週刊》，發現戴耀廷當時係接受「非常人語」訪問，佢話﹕「能有一萬人的話，警察不可能四個抬走一個……中環散了，你就到灣仔警署自首，要求落口供，轉移癱瘓警署，但你要有被起訴的準備。」