上周表演撐亞視 梁安琪推新節目《搖擺天使》

【明報專訊】靠主持《搖擺天使》成名嘅1980年代DJ組合「六啤半」成員、新城前台長梁安琪（Angel），上個星期喺亞視義演騷《萬眾同心撐亞視》中表演打鼓加rap，表演得好唔好見仁見智，但片段喺網上瘋傳，亞視當時講明會幫梁安琪開新節目，而新節目噚日推出宣傳片，見到梁安琪著住黑色T恤大講搖滾經，節目會喺今個星期六（31號）晚11點40分首播，長10分鐘。


訪本地新樂隊 邀現場演出

睇番亞視網站簡介，新節目將會係搖擺天使梁安琪電視版，每集會訪問本地樂隊新生代，畀機會佢哋現場演出，梁安琪仲會分享絕版珍藏黑膠碟，敬請樂迷期待咁話。亞視雖然無錢出糧，但仍然有好多搞作，有亞視中人話家開拍嘅新節目都有全額贊助，但暫時唔太清楚贊助商係邊個。其實Emily比較關心到節目播出嗰日，亞視員工拎得番12月份欠薪未囉。