田少唱海闊天空

【明報專訊】佔領運動期間，「佔區」成日聽到有人唱《海闊天空》，呢首歌好似變咗佔中歌曲咁。不過，自由黨田北俊無顧忌，喺前晚周梁淑怡壽宴中，有政務司長林鄭月娥在場嘅時間，同黨友一齊高唱呢首歌，有與會者同Emily講林鄭都聽得好開心，仲有拍掌打拍子。


自由黨少壯捧田北俊上台

周梁淑怡七十大壽，前晚設宴招呼一眾政商好友。田少之前喺facebook留言話「不羈放縱愛自由」，有人就挑機，叫佢喺林鄭面前唱呢首歌。自由黨一班後生仔就搞鬼，喺前晚捉咗田少上台唱歌。


自由黨青年團主席李梓敬就話，佢哋間中都有一齊唱呢首歌，話呢首歌好聽，並唔係佔中嘅專利，講笑話自由黨梗係「愛自由」，合晒邏輯。佢話自由黨反對佔中，所以佢哋當然唔會唱《撐起雨傘》啦。