菲傭攝影師獲獎學金

【明報專訊】菲傭姐姐平日忙於打理家頭細務，咪以為佢哋只係叻洗衫煮飯湊小朋友，嚟咗香港做菲傭9年嘅Xyza Bacani就喺公餘發展自己興趣，仲努力進修，佢憑住一張張喺香港街頭拍攝、觸動人心嘅照片，得到Magnum Foundation賞識，攞到2015 Human Rights Fellowship獎學金，今年夏天會去紐約大學修讀為期6個星期嘅課程，希望將來可以用影像喚起外界對家鄉人權狀况嘅關注。


Magnum賞識 將赴美進修

Xyza今年27歲，據佢之前接受菲律賓傳媒同CNN嘅報道所講，佢來港前於家鄉已有讀護士課程，來港後平時要照顧僱主嘅7個孫仔孫女，工作都好忙㗎，多數用公餘時間影相。Xyza早前幫過一個受虐女傭支援中心影相，已經嶄露頭角，題材由女傭日常生活、香港大街小巷，以至上年嘅佔領運動都一一捕捉喺鏡頭下。


佢開設facebook專頁（Xaxaphotography）上載照片，吸引咗菲籍著名攝影師Rick Rocamora嘅注意，介紹咗唔少攝影師佢識，佢有作品掛咗喺香港外國記者會（FCC），仲曾經喺菲律賓駐港領事館搞過相展。今次攞到獎學金，Xyza喺facebook度話收到消息時開心到喊，Emily亦喺度講聲恭喜晒！