馮煒光投稿向梁繼昌挑機

【明報專訊】新聞統籌專員馮煒光近日愈來愈高調，除咗以「個人身分」上《城市論壇》，近日仲不斷寫文投稿畀傳媒，最新一篇係向會計界立法會議員梁繼昌（Kenneth）挑機。話說Kenneth前日喺《信報》寫文評論《施政報告》嘅經濟範疇，佢話覺得今次提到嘅經濟政策，似乎只傾向將香港當成內地其中一個城市等。


馮煒光噚日就投稿信報回應對方，不單止重提施政報告宣讀當日泛民離席一事，佢仲質問Kenneth係咪會反對創新及科技局撥款，會唔會去拉布？

兩邊互諷 梁指不想變筆戰

Kenneth就同Emily講，覺得馮煒光近嚟幾high，但相信應該唔係公事上，或者得閒所以寫文回應佢。佢話馮煒光篇文部分觀點都係重複其他人嘅說法，強調自己喺議會嘅工作大家有眼睇，佢會用自己方法去做，唔會畀對方一篇文影響。


Kenneth話，明日會再寫文回應對方，但希望就咁完結，唔想變成筆戰喎。對於文中馮煒光質疑佢「黨性掩蓋理性」，Kenneth即講笑反諷馮，話自己係真正「地下共產黨員」喎！


以前嘅新聞統籌專員好少投稿傳媒，馮煒光就話，講出政府立場係佢工作之一，相信理直就可以氣壯；至於有無稿費，佢就表明就算有都唔會收。