我要真普選印戰衣

【明報專訊】呢個星期日就係渣打馬拉松舉行之日，支持普選團體「移印撐雨傘」，前晚開始一連兩晚喺金鐘立法會外嘅「添美村」，幫市民喺衣服上印「我要真普選」等字句，唔少跑手仲專程將「戰衣」拎嚟印製圖案。馬拉松籌委會主席高威林話，大會喺服飾上無限制，如果跑手拎黃傘甚至拎自拍神棍去玩影相，只要唔係用嚟攻擊人或者阻礙賽事，大會唔會阻止。不過，高主席反問，拎住把遮，點可能跑得完馬拉松？


高威林噚日話，大會喺服飾上無限制，只要參加者手上嘅物件對其他跑手唔造成危險，「我哋係唔會要求佢哋收埋」。不過，如果有人疑似阻礙到其他跑手，在場工作人員會先呼籲，希望佢哋可以離開，如果控制唔到，就可能需要警方幫忙。


大會：拎遮跑步好辛苦

早前有跑手發起，起跑時向主禮嘅警務處長曾偉雄及政務司長林鄭月娥發出「噓」聲。高威林話，香港大眾知道呢個係體育項目，唔應該將政治加插入去，一個健康嘅體育活動，應該畀參加者完成賽事。對於有人話拎黃傘，佢話其實帶住雨遮跑步好辛苦，希望有咩訴求，可以喺另外一些地方發表喎。