李慧琼：屋企老公話晒事

【明報專訊】民建聯家庭事務委員會有新搞作，為宣揚家庭核心價值，最近出咗本《家+We are Family》雜誌，搵咗3對夫婦講相處之道。唔知係咪過去民建聯出嘅刊物未必可以吸引太多注意，今次就特別搵一間流行雜誌幫佢哋製作，由寫稿到排版設計都外判，唔知嘅人，真係以為市面上有新雜誌"口添"。今次印6000本周街派，都好受歡迎，希望可以變成每季出一本。
外判畀流行雜誌製作
除咗訪問尋常夫婦，黨友亦唔少得，今次訪問咗民建聯副主席李慧琼，佢話從政的確犧牲咗同家人相處時間，透露當年決定選立法會時，就有朋友提醒佢「小心搞到離婚收場」。所以返到屋企，就會將決定權交晒畀老公，提醒自己返到屋企就係太太、阿女嘅媽媽。
其他民建聯區議員亦分享佢哋嘅家庭生活同如何自處，好似家庭事務委員會主席鄭泳舜係三子之父，每星期日都會抽時間，輪流同其中一個仔食早餐，製造二人獨處時間，同佢哋傾吓男仔嘢。有個1歲半囡囡嘅中西區議員蕭嘉怡，早前拋低個女同老公二人世界去旅行，佢話有咗小朋友後，好多時話題都圍繞女兒，但都要抽時間兩人相處。