渣打冼「博得」 落台賠率4:6

【明報專訊】係外國乜都有得賭。最近渣打集團（2888）因為人事問題，股價越跌越殘，搞到啲股東無啖好食。不過喺英國嘅博彩市場，就攞渣打行政總裁冼博德嘅去留，都可以開出彩池。或者渣打啲股東可以投注吓對冲番股價跌幅，有名你叫冼「博得」，話唔定真係博得過呀！


每注加至4英鎊 炒魷機會增

現時有開出彩池嘅兩大博彩公司Ladbrokes同Paddy Power，佢地賭冼博德捱唔過今年落台嘅盤口，賠率分別係4賠6同4賠7。睇番以前條數，Ladbrokes開嘅同一盤口，相比起半年前每注2英鎊就受注，宜家要4英鎊先受注，亦即係估冼博德隨時無得撈機會大咗好多。博彩公司開得出嚟嘅，有時都反映咗市場嘅睇法，所以唔好唔信邪。不過講開又講，宜家渣打啲認購輪跌到仙到唔仙，博佢反彈都有時有得執，又唔使吓吓咁高成本嘅隔山買牛呢。


[小琴密語 email: piano@mingpao.com]