教師評「沒香港人」捱轟

【明報專訊】噚日網上流傳一份聖母幼稚園嘅作句練習（圖），例句係「我是中國人」，幼童抄寫4次「我是中國人」，教師蓋印讚「Nice」，題目又要求學生以「••••是••••。」嘅句式創作句子。結果有學生回答「我是香港人。」教師批改時只喺劃咗一剔一點，仲寫明「沒有香港人的！」教師嘅評語惹嚟大批網民批評教師誤人子弟，質疑校方「赤化」，反問「點會無香港人？」


聖母幼稚園：練習旨在教國籍概念

聖母幼稚園噚日隨即向家長發信，回應「持守政治中立原則」。信中解釋，作句練習係屬於「我愛中國」主題，介紹中國同香港嘅關係，令學生明白國籍係以國家為本嘅概念，並唔係以地區、省份做區分，所以叫自己做「中國人」。家長信承認，教師對學生創作「我是香港人」嘅句子，喺文字上嘅回應稍為唔足夠，無詳細顯示課堂中講解嘅相關概念，引起誤會，深感遺憾。