老婆約睇戲 CY請食檸檬

【明報專訊】特首梁振英（CY）最新一份《施政報告》提出要興建多啲電影院，引起社會唔少討論。噚日朝早CY出席4個電台聯播嘅「施政論壇」，主持人黃永首先問佢對上一次睇戲係幾時，CY就話3星期前一家人先睇完戲，前晚梁太同囡囡想約佢噚晚去睇戲，話有4張戲飛，但CY就話因為要忙施政報告工作，自己去唔到。


CY仲話，電影院係家庭娛樂一樣好重要嘅設施，仲話「文化係一種事業，亦係一種產業」，計劃日後賣地嘅時候指定地契要寫明必須要有幾多影院座位，即使重建都要保留電影院。被問到點解只幫電影行業？佢話回歸前政府賣地嘅時候都有提出過類似嘅要求，例如車位、貨車位比例等。


市民：起多啲泳池好過戲院

雖然特首好積極推動電影院政策，但噚日聽眾黃小姐打上去話，平日去九龍公園游水都好迫，戲院對市民其實無咁緊要，CY成日話要倡導全民運動，不如起多幾個游泳池好過，唔知CY又會唔會考慮吓幫助運動產業呢。