翟紹唐連任否「天機不可泄漏」

【明報專訊】最低工資委員會主席翟紹唐噚日戴住副新眼鏡見傳媒，講番好高興政府接納委員會建議，將最低工資水平增至32.5元。Emily同其他行家都好關注2月就滿4年任期嘅「翟少」，政府唔會唔同佢續多兩年。


有記者問噚日係唔係佢最後一次見記者？翟少笑笑口話「天機不可泄漏」，凡事都有可能，噚日有可能係自己最後一次以主席身分同大家見面都唔定，叫大家「拭目以待」。唔通翟少加入咗董伯伯個團結香港基金之後有新計劃？佢話如無意外，無人被炒魷魚嘅話，佢同其他委員直到2月都仲係呢個委員會成員。


至於大律師公會主席石永泰早前批評政府開口埋口講依法辦事，翟紹唐認唔認同呢？佢就話都係集中處理番最低工資問題，唔答住。咁梁振英將最低工資擺埋落施政報告有無搶咗佢功勞？翟少話絕無咁諗過，叫大家問番CY點解會咁公布。


被問到做呢個位吃唔吃力，翟少話一定吃力，「起碼我做嘅公職多數都吃力」，但唔算苦差，因有好多得着，識多好多朋友，仲話能夠貢獻香港，佢好樂意去做。