新聞類別
副刊
詳情#
【明報專訊】特首梁振英（CY）喺今年《施政報告》提到，早前有個5歲小朋友問佢﹕「我長大後住哪裏？香港還有沒有足夠土地？」唔少人質疑究竟呢個5歲細路係咪真有其人？噚日立法會答問大會上，衛生服務界議員李國麟就用番5歲小朋友去同CY溝通，話自己前日返屋企，都遇到個5歲小朋友，仲問佢可唔可以畀香港大學學生會刊物《學苑》佢睇"口添"。
李：細路問讀乜係咪要先問特首
李國麟話，個小朋友話因為特首叫佢唔好睇，所以佢好奇喎，又話個細路仲問佢遲啲係咪大學讀乜嘢都要問特首？李國麟話大學有言論自由，但都希望代佢問特首，「係咪應該讀大學？」
當CY一面正經，回應話佢自己一直有同年輕人溝通等，李國麟追住唔放，話啱啱用電話同5歲細路仔溝通，細路託佢追問，希望特首保證唔打壓學術自由！
田北俊：CY李國麟都係亂吹
就在此時，廠商會立法會議員林大輝就搭嘴，同主席曾鈺成講，話佢覺得兩個5歲小朋友故事都係虛構嘅，係咪應該討論虛構嘅事呢？工黨李卓人就趁機話，林大輝咁講，係咪即係話「689講大話」、有無冒犯呢？
曾主席無理佢哋，咁啱大會時間已到，李國麟係最後一人問問題，所以CY回應完就散會。
完咗會，自由黨田北俊都「抽水」，又向記者講佢3個孫女嘅對話，話前晚同佢哋講，話鍾意睇立法會多過卡通片，因為可以「掟嘢」，而學校唔准喎。不過，佢就一早講明自己係老作，話CY同李國麟口中所講嘅事都應該係亂吹。
回應 (0)
