「幫港」論壇 有人叫保亞視滅港台

【明報專訊】「幫港出聲」噚日舉行政改論壇，有唔少人參加。唔知係咪「幫港出聲」過去一年喚醒咗香港人，席間觀眾除咗提出政改問題，亦有人好關注傳媒生態，趁機高呼「我要本港台」，話香港其他電視台都有外國勢力介入，形容係「美國台」，所以要反對被外國新聞「洗腦」，保住亞視。傳媒出身嘅召集人周融就回應話﹕「相信白武士最終都會出現。」


除咗為亞視發聲，亦有市民問周融，點解香港政府唔解散「香港電台」，仍然畀佢日日鬧政府，周融就話「如果政府願意被人蝦，就會永遠都被人蝦」。


今明兩年分別有區議會同立法會選舉，大家都關心一啲因為反佔中而為人熟悉嘅政治人物會唔會參選。不過，周融就話唔會參加任何競選，但就會積極喚醒市民對香港政治嘅睇法，呼籲市民投票。