譚耀宗與Ann姐談談情

【明報專訊】民建聯蔣麗芸（Ann姐）最近搞咗個「會客室」節目，搵唔同嘉賓同佢傾偈，噚日有第一集睇，嘉賓係民建聯主席譚耀宗。平時講嘢小心、都算密不透風嘅譚sir，對住Ann姐都算坦白，透露自己當年點追老婆，仲提供埋陳年合照畀Ann姐。


曾當櫥窗陳列員

相信唔少人都知道譚sir係工會出身，但究竟佢當年係打乜工而入到工會呢？Ann姐就話有指譚sir教書，亦有聽過有人話佢係紮鐵嘅，希望對方澄清吓。譚sir就自爆當年喺百貨公司做櫥窗陳列員，佢話呢份工都有啲設計成分，因為櫥窗都要不斷更新，所以佢從政亦希望不斷更新、變化喎。


譚sir話當年做做吓就加入工會，亦因為咁而認識到太太，佢話當年20幾歲，鍾意玩、報咗好多工會活動，就有機會同太太多接觸，而佢其後就轉到工聯會工作。譚sir話，當年佢同太太由相識到拍拖都唔係好長時間，間中都係去睇吓戲、夜晚行吓街咁，25歲就做咗老襯喇。


以沉默應付老婆發牢騷

譚氏伉儷早於1974年已結婚，有兩個仔，家孫女都有3個，談到同老婆相處之道，譚sir話其實佢哋相處少，所以都少嗌交，如果遇着老婆發牢騷，佢就會唔出聲一日半日，等老婆知道自己過咗火就會調整㗎喇。Ann姐嚟緊下星期日會有第二集，但佢唔肯透露嘉賓係邊個，不過佢話民主黨主席劉慧卿已應承上會客室。