163宗增值失敗

【明報專訊】港鐵港島線西延線上月28日通車，港鐵車務營運主管李聖基（基哥）噚日做總結，話服務大致穩定暢順，已通車嘅香港大學站同堅尼地城站合共每日平均有10萬人次使用，而西營盤站進度理想，3月底可以啟用。


港大站堅尼地城站日均10萬客

西港島線同時引入13部「三合一」自動售票機，當中有八達通增值、購買單程飛功能，而可以用八達通買單程飛，就被網民比喻為「太陽能電筒」，基哥解釋其實都係多個選擇，「等於使用八達通購物一樣咁方便」；新機增值過程亦有唔同，唔似舊機咁要將八達通卡插入部機，只需要放喺機上面拍卡就得。


基哥話，可能市民未係好熟習新機運作，至今發現到有163宗未能成功增值個案，涉及款項超過1萬元，有關市民未有妥善將八達通放喺讀卡器，或未增值完就拎走咗張卡，港鐵已跟進七成個案，受影響市民可到客務中心查詢，會安排退款。