林鄭戴「潮物」手帶變生招牌

【明報專訊】勤力及被形容為「好打得」嘅政務司長林鄭月娥，近來就政改第二階段諮詢應該好鬼忙碌，原來佢都幾注意健康。噚日朝早林太出席電台節目時，Emily同行家都留意到佢右手手腕戴上近年「潮物」Fitbit Flex，呢條手帶可統計運動量，更可記錄睡眠質素，包括淺睡同深睡時間，近年深受熱愛運動及注意健康嘅人歡迎。零售價約900元。


品牌借機宣傳 網友稱罷買

有傳媒噚日隨即於網上即時新聞報道呢個信息，有關手帶公司Fitbit見港府第二把交椅官員都戴，即當林鄭係宣傳「生招牌」，在其facebook專頁轉載，封林鄭係「新一代健康潮人」，指佢「帶着Fitbit Flex出席電台訪問活動」。不過，唔少網民似乎唔太受落，有人留言話知道林鄭戴咗之後，要表態罷買，Fitbit其後仲刪除咗帖子