「阿拉伯朋友」 正傳出爐

【明報專訊】內地又出版一本關於我哋嗰位著名嘅「阿拉伯朋友」——阿里巴巴，叫《阿里巴巴正傳》，作者公開咗唔少阿里揸fit人馬雲嘅談話內容。馬雲寸盡中國科網界名人，話京東商城經營模式唔掂，將來會成為悲劇，不過件事噚日一鬧大咗，馬雲就即刻「補飛」，話唔知對話會被人寫出嚟，又嘗試兜返話世上無完美經營模式，兜唔兜到？你話呢？


至於騰訊同百度，喺馬雲眼中，都未夠班做競爭對手。佢話如果阿里巴巴係航空母艦，騰訊同埋百度只係艦載機嘅層次。至於微信同京東嘅合作，馬雲認為「愚蠢」。佢覺得得返自己可以睇到五年、八年以後嘅佈局，騰訊戰略上有好多問題。


講到京東，佢仲話係一場悲劇，「我在公司一再告訴大家，千萬不要去碰京東。別到時候自己死了賴上我們。」


亞馬遜係唔係馬雲心嘅對手呢？馬雲一邊大贊亞馬遜主席貝佐斯，一邊話「既生瑜何生亮」，「如果美國有阿里巴巴，亞馬遜還能活嗎？美國因為沒有阿里巴巴，才讓亞馬遜活下來！」小琴無語，只希望馬雲呢份自信有根有據，可以長此以往。


[小琴密語]