陳克勤試揸電動車讚夠力

【明報專訊】Emily噚日收到民建聯立法會議員陳克勤一張相，相中克勤仔成個車主咁揸緊美國車廠Tesla Motors嘅電動車，不過原來佢唔係買車，只係試車，撰寫緊一份電動車試驗計劃報告。呢份報告即將交畀環境局及推動使用電動車輛督導委員會，克勤仔話，預計報告會建議政府起更多充電站，另方面亦會建議畀電動車優先使用部分路面，吸引車主。


克勤仔話試車係公開、係公務，已經通晒天，無申報問題，今次試車係應美國車廠Tesla Motors嘅邀請，之前亦試過日產、三菱同國產比亞迪嘅電動車。


今次試咗兩個鐘Tesla車仔，佢大讚Tesla車好夠力，同普通車一樣舒服，重點係零排放，克勤仔話相信如果唔係最近油價跌，對準買家嚟講吸引力會更大。本報上Tesla網頁睇番，最便宜嘅Tesla大概都要50幾萬港元。