葉太田二少廣西考察

【明報專訊】經過一個長假期，政界又開始熱鬧番，今日下午先有民情報告公布，政務司長林鄭月娥聽日又會啟動政改第二輪諮詢。


不過就算香港風起雲湧，相信有一個政黨呢兩日可以有片刻寧靜，呢個「幸運」嘅政黨就係新民黨嘞。事關身兼行會成員嘅新民黨主席葉劉淑儀，噚日起率領黨友、顧問、商界人士等，出發去廣西訪問，星期四先返，避過咗政改大日子。


葉太同常務副主席田北辰、副主席潘國山訪問廣西，行程包括參觀南寧市五象新區、經濟開發區、東興市口岸同貿易建設等，據聞亦會拜訪中聯辦前主任、現廣西壯族自治區黨委書記彭清華。


葉太：助長兩地交流

葉太話廣西處於中國、東盟自由貿易區嘅前沿同樞紐位置，希望今次透過考察，可以更了解廣西更多嘅投資機遇同地區發展，加強桂港兩地嘅交流。田二少話，廣西山明水秀，相信能夠借鑑上海自貿區嘅先進經驗，提升中國、東盟自由貿易區嘅發展。