做授權設計 雷頌德踩入商界

【明報專訊】繼謝霆鋒、劉嘉玲之後，再有藝人殺入商界大展拳腳，由音樂創作人雷頌德（Mark）所設計嘅一系列授權產品將會首度響下星期一（12日）起、一連三日於貿發局舉辦嘅香港國際授權展亮相。噚日Mark出席記者會就講番，一切源於舊年10月佢搞畫展，估唔到反應好好，唔少商家之後都想搵佢幫手設計，所以佢家同業務伙伴RT Management合作搞授權業務，好似早輪有間中持基業（1825）就同佢哋簽咗約，搵Mark設計佢地生產嘅家俬。除此之外，珠寶品牌Aaron、飛利浦等等都有同Mark合作。Mark仲話，首度參加貿發局授權展，希望有多啲人睇到佢嘅設計，亦身體力行支持本地原創。


除咗雷頌德首次參展，貿發局副總裁葉澤恩透露，今屆授權展參展商按年升成33%，仲得到國家文化部支持，率領包括故宮博物院在內共40幾間內地文創機構參加。此外貿發局亦同Pacific Coffee合作，響指定咖啡店推廣香港原創公仔，包括老夫子、麥嘜麥兜、Chocolate Rain、馬仔同蘇飛，實行要帶埋呢班原創公仔衝出會展。


email: piano@mingpao.com

[小琴密語]