銷售不跌反升 工展會買細開大

【明報專訊】為期24日嘅工展會噚日完結，一開始大家仲擔心工展會可能受佔領運動影響，但最終影響睇嚟唔大，因為廠商會噚晚公布，今屆工展會總銷售額超過9億元，比起去年嘅8億元仲要升咗超過一成半。


營業額整體增四成

Emily噚日入場睇過，去到下午4點都唔多商戶割價傾銷，普遍展商都話人流較舊年多咗之餘，銷售額都有約一成增長。南北行業務經理崔家權喺工展會開幕前，估計今年銷情只會有一成增長，點知噚日Emily問番佢，佢話成個展期營業額比去年有四成增幅，連原本預備定過年前賣嘅貨品都喺工展會賣埋，估計同優惠多有關，又話剛卸任嘅廠商會前會長施榮懷估人流較上年少兩成唔啱，話現場觀察起碼多兩成。


旅客笑指為佔中補數

亦有賣XO醬嘅展商陳先生講笑話，之前佔中期間市民喺屋企都好悶，於是完咗佔中就出番晒嚟消費，曾經擔心佔領令市民唔敢行街嘅佢形容，收入比去年有三四成增長。


又有內地客專程落嚟工展會買嘢，來自東莞嘅陳伯伯話會場貨品價錢唔係平，但係有信心保證，仲話要「為之前佔中補番，振興經濟」喎。