警隊網頁改版 載逾500感謝信

【明報專訊】警隊網頁前幾日改咗版，係2014年內第三次改版，第一次係1月2號，第二次係7月25號，第三次係12月30號。Emily就唔覺得設計有太大改動，不過一click入警隊個新網頁，就見到大大隻字寫住「上下一心，專業處理非法佔領」，入面原來有市民寄畀警隊嘅感謝信，仲有500幾封咁多。


「上下一心，專業處理非法佔領」

Emily見到有唔少人寫信讚警隊，有留學生、前輔警、的士司機、退休公務員等，覺得警隊專業克制、使用最低武力，亦都有市民寫信慰問金鐘清場後突然暈倒嘅談國倫警長。市民「Ho Hin」覺得「警務人員冒着受傷的危險去拯救曾經攻擊自己的人，很多人都做不到」；「亞仁」覺得警隊「很有紀律，亦有高尚的品格」；有住喺加拿大嘅港人話警察「您們無錯」。


新網頁仲有幾十封警隊處理佔領嘅相，但警察用催淚彈同警棍嘅相就欠奉，網頁亦連結去警隊YouTube，佢哋最新訪問咗早前喺旺角被磚頭掟中額頭而縫5針嘅PTU督察。