金秀賢馬拉拉膺風雲男女

【明報專訊】港台《晨光第一線》噚日公布2014風雲人物大選結果，喺八個獎項類別當中，有四個第一名係同佔領運動有關，雙學（學民思潮及學聯）同學聯分別當選為「風雲組合」同「風雲團體」第一名。

「風雲潮物」第一名則係黃色雨傘。至於今年「風雲金句」第一位則由全港佔領者奪得，得獎金句就喺﹕「我要真普選﹗」

「雙學」當選風雲組合

今次投票，先由市民致電提名，再喺網上一人一票選出，相當民主，得獎人物、事件唔少都同政治有關，好似「風雲組合」就由「雙學」、政改三人組、佔中三子奪得冠、亞、季軍。不過，喺風雲男士同風雲女士兩項獎項中就輸咗畀「外國勢力」，兩項獎項第一位分別由《來自星星的你》嘅韓星金秀賢，同諾貝爾和平獎得主、巴基斯坦少女馬拉拉獲得。

今次仲有一項風雲「"火羅"」人選舉，第一名係上屆會期夾硬表決通過新界東北發展撥款嘅財委會前主席吳亮星奪得。第二名則係壹傳媒前主席黎智英同工黨主席李卓人，Emily睇到一頭霧水之際先至發現，原來提名人幫佢哋改咗個新組合名，叫做「捲入政治捐款醜聞二人幫」。