三地新聞人物榜 有周永康冇周永康

【明報專訊】城大翻譯及語言學系噚日公布「2014年港台京新聞人物榜」，該學系榮休教授鄒嘉彥教授話，2014年喺三地同時出現嘅新聞人物共15人（部分見表），包括「周永康」，不過就唔係學聯秘書長周永康，而係中共前政治局常委周永康。


今次嘅新聞人物榜係城大以「LIVAC漢語共時語料庫」，每兩周統計並分析港台京三地新聞人物，將見報率最高嘅25人收入三地嘅「雙周新聞人物榜」。


無佔領人物 城大﹕年尾發生

不過，如果分開三地新聞人物各自統計，港台京三地嘅新聞名人榜首位都係當地嘅首長，分別係特首梁振英、台灣總統馬英九、中國國家主席習近平，而美國總統奧巴馬、日本首相安倍晉三同時打入三地十大新聞入物，不過喺各地嘅排名就略有不同。


數到新聞人物，2014年點解無佔中三子、學聯周永康及學民黃之鋒呢？鄒嘉彥教授噚日就話，原因主要有二﹕首先係佔領喺年尾先發生，其次運動唔係由單一人物領導，亦由於人物太多，所以大家嘅見報率亦會分散。


除政治人物外，上榜嘅仲包括體育及娛樂界人物，好似「來自星星」嘅韓星金秀賢就打入香港十大新聞人物，排名第5，高過政務司長林鄭月娥一名；排第8嘅係於世界盃期間咬人嘅烏拉圭前鋒蘇亞雷斯。


黃之鋒膺泰晤士報年度青年

黃之鋒唔入城大新聞人物榜，但英國《泰晤士報》就選咗佢做「年度青年」。泰晤士報話，中國正處於經濟強大嘅年代，一直都害怕呢個體系被破壞，而今年香港發生嘅雨傘運動，正好說明政制停滯與經濟發展之間嘅分歧。該報讚揚年僅18歲嘅之鋒堅持爭取民主，應獲嘉許。