CY籲包容 林鄭要迎難而上

【明報專訊】普天同慶嘅聖誕節又到，經歷咗近80日嘅佔領行動，大家可以放鬆一下過節，聖誕節上京述職嘅特首梁振英（CY）就希望大家喺新一年「以智慧和包容面對來年各種挑戰」。雖然CY無明言來年有咩挑戰，但大家都預見到政改會係2015年嘅大事；政務司長林鄭月娥亦話，2015年係本屆政府嘅中途站，「我們既應回顧過去兩年半的施政成效，也要繼續迎難而上」。


政改三人組中，林太同律政司長袁國強嘅新年願望都同政改有關，林太冀落實2017年普選特首；袁國強就呼籲社會以理性、務實同包容嘅態度，喺《基本法》同人大常委嘅決定上，尋找實現普選嘅共識。不過，政制及內地事務局長譚志源嘅願望就好玄，「聖誕的信息是平安及喜樂；新年的祝願乃盼望和更新」，唔知局長盼望啲乜嘢呢？


袁國強不忘佔領﹕盼惜法治

CY回覆Emily，話香港喺過去幾個月雖然經歷不少風浪，但憑着平和、理性同務實嘅處事方法，「我們再次渡過難關」，希望大家面對來年各種挑戰，同時掌握好社會發展和經濟發展嘅機遇。


政府擬於1月推出第二輪政改公眾諮詢，林太就希望繼續依法推進民主，但佢都係老調子，話要喺《基本法》同人大常委決定嘅框架下，落實2017年普選。袁國強就仍然不忘「佔領」，希望大家經過事件後，都能更明白同珍惜法治嘅可貴，摒棄以非法或破壞社會秩序嘅方式表達訴求。